Blíðfinnur bloggar

Ég er á lífi

Sun, 27 May 2007 23:58:12 GMT

Jæja gott fólk, hélduð að ég væri hættur að blogga ? Ekki alveg. Frá því síðast hefur ýmislegt verið gert hér á Móabarðinu. Við hjónin fluttum yfir í barnaherbergið og Gunnar fór yfir í hjónaherbergið. Þegar ég tók niður skápinn sem var í hans herbergi þá þurfti ég náttúrulega að bæta við loftaplötum og allt í lagi með það. Framleiðandi hafði frá því ég setti þær upp síðast breytt hvíta litnum þannig að ég varð að mála allt loftið og allt í lagi með það. Síðan vantaði mig parkett og það var ekki til í landinu en ég hafði verið svo forsjáll að eiga til tvær og hálfa plötu úti í bílskúr og nú komu þær að góðum notum og allt í lagi með það. Málningin sem ég keypti á loftið var líka seld mér á veggina en hún var svo mött, (með gljástig – 10, eða eitthvað) svo ég varð að mála allt herbergið aftur og allt í lagi með það. Þegar ég svo ætlaði að setja upp loftalista þá fékk minn haus ekki skilið hvernig best væri að saga þá í kantana og ekki í lagi með það. Það þýddi að ég hringdi og Guðna og hann kom og bjargaði sálartetrinu það kvöldið. Þá kom Guðni og við rifum niður bílskúrshurðina og settum gönguhurð í staðinn og síðan var settur timburveggur þannig að þetta er nú orðin geymsla enda var það aldrei neitt annað og allt í lagi með það. Á morgun ætla ég svo að setja niður tré sem kemur til með að tengja okkur við fjöllin í Catskills í Bandaríkjunum og Danmörku en þetta tré heitir Kirsuberjatré eða Blossom á útlensku. Þetta tré ber bleik blóm á vorin en fellir þau síðan og laufgast. Þá verður farið upp á þak og byrjað að rífa niður bárujárnið en einhvertíma á næsta hálfa mánuði koma menn og setja nýtt bárujárn á þakið. Þannig að þú getur sér að það er í nógu að snúast. Þá gæli ég við að komast einhvertíma í silung en ég á þó dag í Hlíarvatni í byrjun júni. Við skulum vona að það verði aðeins farið að hlína þannig að það verði komið líf en annars þarf maður að vera með allt niðri í botni. Meira síðar mín kæru. Kær kveðja í bili

Á sjó.....

Fri, 11 May 2007 00:17:22 GMT

Loksins, loksins á síðasta degi komst ég í svartfugl. Við lögðum úr Hafnarfjarðarhöfn um kl.11 og eftir klukkutíma var kominn einn lundi svo að ekki lofaði það góðu. Villi flengist um allan sjó og viti menn loksins komumst við í fugl á Syðra-Hrauni. Mest var um lunda en þó náðum við í nokkrar langvíur. Eftir daginn lágu 57 fuglar og eins renndi Villi fyrir fisk og fékk í soðið. Þetta var semsagt góður dagur þó að hann hafi ekki sýnt það í byrjun. Það sem okkur fannst þó furðulegt að ekki skyldu vera fleiri bátar á sjó. Hugsanlega var að veðrið var ekki upp á sitt besta heldur var kaldaskítur og erfitt að skjóta á fuglinn. Eins var gaman að sjá að það var talsvert um hvali í Flóanum, sáum meðal annars litla hrefnu og eins sáum við hnísur og höfrunga. Takk fyrir í dag.

Tveir góðir saman :)

Kominn heim

Sat, 05 May 2007 21:00:02 GMT

Jæja jæja allt í lagi. Þið sem eruð búin að fara inn á þessa síðu og ekkert hefur gerst. Ég skal reyna að bæta úr því. Ferðin til Danmerkur var mjög góð. Að sjálfsögðu var lagt á ráðin með næsta villibráðarkvöld sem verður hjá Þórði í nóvember. Var ákveðið að taka ekkert með sér héðan af landi heldur leggja áherslu á danska villibráð svo sem ál, villisvín, fashana, dádýr, akurhænur, héra og eitthvað sem okkur dettur í hug. Ef ég verð enn með þessa síðu á komandi haust fáið þið að vita hvernig til tókst. Við fórum yfir til Þýskalands eftir því sem mér var sagt. Það eina sem ég sá að var þýskt voru löggubílar við landamæraskúr en ég veit ekki hvort að einhver var þar inni. Svo ókum við um götur sem enduðu á –strase. Að sjálfsögðu fórum við í verslun þar sem í boði var bjór, vín og sælgæti á mun lægra verði heldur en í Danmörku. Það endaði með því að hátt í 30 kassar af öli og gosi auk víns fóru inn í bílinn hans Þórðar svona til að hafa eitthvað við hendina í sumar þegar hitinn fer upp í 30 stig. Heima hjá Þóðri var gróðursett tré sem mun bera nafn mitt. Eini munurinn á mér og trénu var reyndar að það var svolítið horaðra heldur en ég en vonandi mun Þórður væta úr því, það er að segja að fita tréð en ekki mig. Ferðin til Köben var betri heldur en ferðin til Silkiborgar. Því þegar við keyptum miða suður þá var okkur ekki bent á að kaupa sæti heldur þurftum við að standa upp í tvígang því við sátum í annars manns sætum, út því var bætt á bakaleiðinni og horfðum við upp á alla hina sem reknir voru úr sætum sem einhverjir aðrir áttu. Í tollinum á Kastrup var ég kjaftstopp sem kemur nú reynar ekki oft fyrir. Við vorum með tvær ferðatöskur sem alls vógu 51 kg. Sem sagt við vorum með 11 kg í yfirvigt og fyrir það þurftum við að borga 900 DDK sem er um 10. þús ísl. Þá kom gamli skátinn upp í okkur og að bjarga sér. Þar sem við vorum ekki með neina handtösku með okkur heldur eina samanbrotna í annari töskunni, opnuðum við ferðatöskunatöskuna og tókum handtöskuna úr henni og settum það þyngsta í handtöskuna og svo fóru ferðatöskurnar aftur á vigtina. Allt í himnalagi sagði stúlkan tvær ferðatöskur á samtals 40 kg og ein handtaska á 11 kg. Ekkert að borga og góða ferð. Það sem ég reyndar skil ekki er að við vorum áfram með 51 kg en nú í þremur töskum. Það er ekki skrítið að Íslendirnar séu að kaupa upp allt í Danmörku. Ég skála í Tuborg þegar Íslendingar hafa eignast Tivoli eða Amaligerborg.

kær kveðja, Helgi

Helsen fra Danmark

Fri, 27 Apr 2007 21:28:28 GMT

Jæja kæru vinir. Við Linda erum komin til Danmerkur til vina okkar Þóðar og Maríu. Fórum til Þýskalands í dag og keyptum bjór og ýmislegt annað. Það var nánast gefins. Á morgun förum við Þórður í veiðibúð og svo kíkjum við Linda í H&M til að kaupa eitthvað eða bara til að koma við fötin. í dag ókum við í gæinnn Rybe og er það með fallegustu bæjum sem ég hef séð hér í Danmörku, enda elsti bær landsins með mynjum frá víkingatímabilinu og allar götur síðan þá. þetta er búinn að vera frábær tími og á bara eftir að vera það. Á sunnudaginn förum við svo til Köben og hittum Belindu og Tomma en ætlum svo að hafa mánudaginn fyrir okkur, með smörebrauði og öl. Hugsanlega gengur maður í gengum Kristjáníu ef að tími gefst til. Bara svo að þið séuð ekki að spurja þá var heiðskýrt í dag og 26 stiga hiti svo að þið getið verið ánægð í 10 gráðunum. Hann Gammel Dansk biður að heilsa og einnig bræðurnir Calsberg og Tuborg.

Daglegt stúss

Sun, 22 Apr 2007 23:30:45 GMT

Jæja gott fólk. Það er búið að vera í nógu að stússast og því hef ég ekki getað sest niður til þess að rita nokkrar línur. Sé hins vegar að ekki vantar að áhugasamir líti við og er það ánægjulegt.

Til stendur að fara til Danmerkur á fimmtudaginn til að hitta vinahjón þau Þórð og Mæju og er mikið tilhlökkun hjá mér yfir því. Ráðgert er að fara yfir til Þýskalands á föstudeginum en þangað hef ég aldrei komið. Þórður er búinn að skipuleggja það út í æsar. Síðan förum við til Köben á sunnudeginum og hittum fólkið hennar Lindu en komum svo aftur til baka á þriðjudeginum þann 1. maí. Ég reikna með að taka eitthvað af mat með mér eins og sönnum Íslending sæmir. Tollverðir í Köben segjast finna það á lyktinni ef að farangur er frá Íslandi eða Grænlendi enda koma íbúar þessara landa alltaf með illa lyktandi mat með sér til Danmerkur. Tek með mér eitthvað af lunda svo Þórður geti gefið þessum svínakjötsætum eitthvað annað til að bragða á. Þegar ég var að skoða í frystikistunni þá rakst ég náttúrulega á svartfugl síðan í fyrra svo að það endaði með því að ég bauð fólki í mat í kvöld. Það heppnaðist vel eins og venjulega enda orðinn vanaði því að elda villibráð heldur en nautakjöt sem virðist alltaf mislukkast hjá mér. Mér datt í hug að setja inn nokkrar mataruppskriftir á villibráð með tíð og tíma. Þó ekki þannig að þurfi að versla hálfa verslun með allskyns kryddum sem enginn þekkir, heldur venjulegan mat.

Á morgun verður svo væntanlega nóg að gera hjá mér eins og öðrum, fyrst er það vinnan svo kóræfing og þegar heim er komið þarf ég að vinna svolítið í garðinum. Ég verð svo að finna tíma til að setja inn nokkrar myndir og linka sem gaman er að skoða. Næsta vika er annars fullbókur í kórastarfi en fyrir þá sem ekki vita þá syng ég í Lögreglukórnum. Við ætlum að syngja fyrir eldri borgara í Laugarnessókn á fimmtudag en þá verð ég á leiðinni til Danmerkur. Svo syngur kórinn í 1. maí messu eins og venjulega en þann 4. maí verður svo farið í kóraferð á Kirkjubæjarklaustur en með þeirri ferð líkur vetrarstarfinu hjá okkur. Það er búið að undirbúa komu okkar að miklum myndugleik eftir því sem ég hef frétt svo að það er tilhlökkun að fara í þá ferð. Kem meira að því síðar og segi ykkur frá ferðinni. Læt þetta nægja að þessu sinni, kv. Blíðfinnur

Sumardagurinn fyrsti

Fri, 20 Apr 2007 21:06:04 GMT

Vá það er aldeilis hvað það hafa farið margir til að skoða þessa síðu í dag. Ég vil byrja á að þakka ykkur fyrir og einnig kærar kveðjur sem ég hef fengið.

Allt um það sumarið byrjaði hjá mér í gær. Það byrjaði reyndar líka hjá ykkur hinum en hjá mér eru þrjú atriði sem að gera það að verkum að sumarið er komið. Það er að ég fæ svartfuglsegg og kemst í veiði, fyrst á svartfugl og síðan í silung. Ég er semsagt búinn að fara á svartfuglaskytteri og svo fór ég til að veiða silung í gær. Reyndar fékk ég engan silung en það skipti ekki máli því ég fór með góðum vini og var með nesti. Lagði mig úti í náttúrunni eftir að hafa drukkið te og borðað flatkökur með hangiketi. Mér var nefnilega boðið í Staðará á sunnanverðu Snæfellsnesi. Ég fór þangaði í fyrra og fékk nokkra fiska, bleikjur og sjóbirtinga. Því var vel þess virði að fara og kanna hvort að bleikjan væri farin að láta sjá sig en svo reyndist þó ekki vera. Það kemur bara annar dagur og önnur ferð sem að gengur betur þannig að ég þurfi ekki að koma öngulsár heim.

Staðará á Snæfellsnesi

Eftir að ég kom heim þá fékk ég æði og klippti niður limgerðið milli mín og nágranna míns. Hann vissi hins vegar af því þar sem að það var búið að ræða þetta í fyrravor en við erum ekki að æsa okkur hér í Móabarðinu þannig að ég lét verða af þessu núna. Því standa ekki nema meters stubbar upp úr moldinni en þeir ætla sér hins vegar að stækka vel í sumar enda er spáð að þetta verði heitasta sumar sem komið hefur hér á landi í aldaraðir.

Í dag var svo verulega stutt vinnuvika þannig að ég ætla að nota helgina og biðja hana Lindu mína að kenna mér svolítið á bloggið og hvernig á setja inn myndir, þó aðalega Ego-myndir eins og hún kallar það. Það eru myndir af mér að veiða, mér að veiða og mér að veiða. Svo verða hugsanlega einhverjar myndir af mér og einhverjum öðrum að veiða, nei bara grín.

Fyrstu skrefin

Thu, 19 Apr 2007 23:16:27 GMT

Já gamli er sestur niður og farinn að blogga. Aldrei hélt ég að ég mundi fara á þessa braut en maður er alltaf að prófa eitthvað nýtt. Verð sennilega orðin húkt á þessu áður en yfir líkur. Kem þá til með að segja ykkur frá því sem á daga mína hefur drifið svo sem veiðiferðum, daglegu amstri og ýmsu öðru. Takk þangað til næst 8|

Velkomin/nn á BlogCentral

Thu, 19 Apr 2007 22:59:15 GMT

Þetta er fyrsta færslan þín á BlogCentral. Til að eyða henni eða breyta notar þú umsjónarvefinn sem þú kemst inná með því að smella á "Vefstjórn" hér í valmyndinni vinstra megin.

Inni í vefstjórninni getur þú skrifað nýjar færslur, breytt færslum eða eytt þeim.
Sama gildir um gestabók þar sem þú getur eytt færslum úr henni og haft yfirsýn yfir um leið þá sem skrifa í þína gestabók

Viljir þú hafa tengla á aðrar heimasíður getur þú auðveldlega bætt þeim við undir "Tenglar" í vefstjórninni.

Til að breyta útliti síðunnar og nota þau útlit sem eru í boði smellirðu á "Stillingar á síðu" sem finna má neðarlega í valmyndinni vinstra megin.

Viljir þú bæta við bloggurum á síðuna þína til að geta skráð sig sömuleiðis inná síðuna þína, þá ferðu í "Notendur" neðst í valmyndinni vinstra megin.

Undir aukahlutir getur þú bætt hinum ýmsu hlutum inná síðuna eins og t.d. niðurteljara, leit, dagatal og fleira.
Gangi þér vel að blogga,

Besti kveðjur, BlogCentral